КАКО ДА ЈА ЗАШТИТИТЕ СМЕТКАТА ОД СМС ФИШИНГ – ова се клучните работи што треба да ги знаете
Македонските корисници на банкарски услуги се под
закана од пробивање на податоците преку т.н. фишинг напади кои се вршат преку
СМС пораки. Зголемениот број на напади го вклучи алармот кај комерцијалните
банки, а истовремено со соопштение излезе и Македонската банкарска асоцијација.
„Согласно искуството кое клиентите го пријавуваат, до нив стигнува СМС
порака на македонски јазик од SMSinfo во врска со „погрешна адреса“ на пратка
заедно со линк кој води до лажна веб страница наменета за нелегално преземање
на податоци за картички и други лични податоци“, посочуваат од МБА.
Како да ја заштитите
сметката од СМС Фишинг?
Фишинг нападите се обид на злонамерни страни да
добијат пристап до податоците на корисниците преку лажно претставување. Овој
вид на „хакерски риболов“, употребува мамка за корисникот која најчесто е во
форма на итна и неодложна акција која треба да се преземе брзо.
Корисниците кои се помалку информирани за
злонамерните методи, гледајќи дека пораката е добиена од наводно легитимен
извор брзаат да ги исполнат барањата на напаѓачот.
Вообичаено тоа е кликање на веб линк кој делува
легитимно, најчесто го содржи и името или дел од називот на банката, но ако
направите едноставна споредба на УРЛ адресата ќе видите дека станува збор за
лажно претставување.
Најчесто фишинг нападите се помалку комплексни и
не одат чекор подалеку од фрлање на мамка на која корисниците самоволно
внесуваат податоци, како на пример број на платежна картичка, код за
верификација и дата на истекување на важноста на картичката.
Тоа се доволно податоци за да се направат
сериозни злоупотреби. Други злонамерни напади имаат за цел само собирање на што
е повеќе лични податоци кои потоаа ги продаваат или пренесуваат на трети
страни.
Бидете сигурни дека
конекцијата е безбедна
Вообичаено секоја онлајн трансакција која има
висок степен на сигурност појавува исимбол на катанче
дека сајтот има воспоставено безбедносен SSL сертификат. Тоа значи дека вашите податоци како лозинки или број на
платежна картичка ќе останат приватни кога се испраќаат до конкретниот веб сајт
на кој вршите онлајн плаќање.
За да ја потврдите онлајн наплатата треба да
поставите и двостепена верификација, односно покрај одобрувањето на плаќањето
со внес на ЦВВ бројот, треба да ја одобрите трансакцијата и преку потврда со
код кој ви стигнува преку СМС на вашиот телефонски број.
Секое пристигнување на СМС порака со ваков код
треба добро да го проверите, односно дали се совпаѓа со сумата која ја плаќате,
називот на трговецот или примачот на средствата и дали содржината на било каков
веб линк се совпаѓа со официјалната веб страна на вашата банка.
Во спротивно веднаш блокирајте ја платежната
картичка и контактирајте ја банката.
Х.С.
