ИЗВЕШТАЈ ЗА 2022: Сител најгледана, Телма прикажала голема загуба, а ТВ21 за прв пат добивка
Во 2022 година највисоки вкупни приходи остварила Сител – 413,69 милиони денари, што претставува речиси 40% од заедничките приходи на петте телевизии. Најниски, пак, биле приходите на Телма, во износ од 118,25 милиони денари.
Заедничкиот финансиски резултат од работењето на петте телевизии во 2022 година е загуба во висина од 15,15 милиони денари, што се должи на високата загуба на Телма (24,11 милиони денари). Останатите четири телевизии оствариле позитивен финансиски резултат.
| ТВ Алфа | ТВ Алсат-М | ТВ Канал 5 | ТВ Сител | ТВ Телма | |
| 2018 | 9.51 | 5.36 | 0.28 | 18.68 | -21.48 |
| 2019 | 39.33 | 8.44 | 1.5 | 28.45 | -21.91 |
| 2020 | -8.85 | 0.53 | -12.11 | -21.89 | -17.47 |
| 2021 | 11.17 | 17.09 | 0.16 | 16.35 | 7.4 |
| 2022 | 0.41 | 3.51 | 0.18 | 4.86 | -24.11 |
Според податоците од истражувањата за гледаноста и слушаноста на радиодифузерите кои ги нарачува Агенцијата, најгледана телевизија и оваа година била Сител, чијшто просечен дневен досег изнесувал 35,60%, а просечен неделен досег 55,43%.
ТЕЛЕВИЗИИ НА ДРЖАВНО НИВО ПРЕКУ НЕОГРАНИЧЕН РЕСУРС
ТВ21 остварила највисоки приходи во анализираната година – 49 милиони денари, односно речиси половина од вкупно остварените приходи во овој сегмент од индустријата. 24 Вести остварила вкупни приходи во износ од 38,36 милиони денари, додека приходите на останатите телевизии се значително пониски – Наша ТВ остварила 7,62 милиони денари, Шења 7,59 милиони денари, Клан 4,56 милиони денари и Сонце 0,15 милиони денари.
| 2018 |
2019 |
2020 |
2021 |
2022 |
Индекс 22/21 | |
| 24 Вести | 88.98 | 66.87 | 66.35 | 54.01 | 38.36 | -28.98% |
| Клан | 14.49 | 10.26 | 12.54 | 20.25 | 4.56 | -77.48% |
| Компани 21-М | 31.51 | 32.20 | 40.01 | 63.16 | 49.00 | -22.42% |
| Наша ТВ | 2.42 | 6.44 | 9.35 | 5.05 | 7.62 | 50.89% |
| Сонце | 0.99 | 0.39 | 1.88 | 0.22 | 0.15 | -31.82% |
| Шења | 15.21 | 13.63 | 10.78 | 14.44 | 7.59 | -47.44% |
| вкупно | 153.60 | 129.79 | 140.91 | 157.13 | 107.28 | -31.73% |
Оваа Анализа се однесува на економските перформанси на субјектите на пазарот на аудио и аудиовизуелни медиумски услуги во 2022 година. Изработена е врз основа на податоците коишто радиодифузерите ги доставија во Агенцијата, а кои се однесуваат на вкупните приходи што тие ги оствариле во 2022 година и структурата на приходите, вкупните трошоци и структурата на трошоците, финансискиот резултат од работењето и бројот на вработените, како и врз основа на податоците од нивните завршни сметки за анализираната година.
Како дополнителен извор за економското работење на јавниот радиодифузен сервис Агенцијата го користеше и „Финансискиот извештај за реализација на финансискиот план на ЈРП Македонска радиотелевизија за 2022 година“.
Покрај податоците за економското работење, во Анализата се прикажани и податоците за гледаноста на телевизиите и за слушаноста на радиостаниците во 2022 година, коишто се добиени со истражување на јавното мислење со примена на методот телефонска анкета, што го спроведе истражувачката агенција Маркет Вижн од Скопје.
