Израел изврши воздушни напади врз цели во Газа по палестинскиот ракетен напад
Израелските сили нападнаа цели во Појасот Газа како одговор на ракета истрелана од територијата на крајбрежната енклава, соопшти утринава армијата, пренесоа светските агенции.
Израелските одбранбени сили соопштија дека цел на нападите биле „објект за производство на суровини за хемиски материјали, како и капацитет за производство на оружје“ за кој се верува дека му припаѓа на Хамас. Оваа радикална палестинска организација ја контролира Газа.
Според непотврдени медиумски извештаи, израелски борбени авиони нападнале цели во бегалски камп во центарот на Газа.
Неколку часа пред израелскиот напад, војската пресретнала ракета истрелана од Појасот Газа, соопшти армијата.
Израелските одбранбени сили (ИДФ) го сметаат Хамас одговорен за сите терористички активности кои произлегуваат од Газа и ќе ги сносат последиците од нарушувањето на безбедноста на Израел, објави израелската војска на Твитер.
