Истражители од Јужна Кореја пристигнаа во Србија, го бараат крипто-милијардерот и измамник До Квон
Официјални лица од јужнокорејското обвинителство и од јужнокорејското Министерството за правда пристигнаа во Белград во потрага по крипто-милијардерот До Квон, кој се претпоставува дека се крие во Србија. Квон стои зад криптовалутата „луна“, чиј колапс „збриша“ инвестиции вредни околу 60 милијарди долари, што е најголемата загуба во светот на крипто.
Потрагата по контроверзниот основач на сега пропаднатиот криптосистем „Тера“, До Квон, се интензивираше бидејќи јужнокорејските власти наводно потврдиле дека испратиле најмалку две лица во Србија да трагаат по него. Според неодамнешниот извештај на Блумберг, обвинителството во Сеул соопшти дека извештаите за нивните претставници кои одат во Белград за да го најдат Квон „не се лажни“.
Јужнокорејскиот Chosun Media претходно објави дека јужнокорејската разузнавачка служба имала информации дека Квон е во Србија. Според тој медиум, во моментов нема договор за екстрадиција меѓу Јужна Кореја и Србија, поради што Квон ја избрал Србија за скривалиште.
Квон е обвинет за кршење на законите за пазарот на капитал во врска со колапсот на криптосистемот „Тера Класик“, кој збриша околу 60 милијарди долари инвестиции, според „Коинтелеграф“. Квон ја основа „Тера Класик“, која ја создаде криптовалутата луна.
Квон е во бегство од средината на септември, кога беше распишана потерница за негово апсење, а по него беше распишана потерница од Интерпол, додека Јужна Кореја му го поништи пасошот.
