Историски чекор во Вашингтон: Православната Црква во Америка и литургиски ја призна автокефалноста на МПЦ-ОА
Во катедралниот храм „Св. Николај Чудотворец“ во Вашингтон, седиштето на Православната Црква во Америка (ОЦА), во вторникот се случи историски настан со кој и литургиски беше потврдено признавањето на автокефалноста на Македонската Православна Црква – Охридска Архиепископија (МПЦ-ОА).
На заедничката света литургија, која ја отслужија поглаварот на ОЦА, Митрополитот Вашингтонски г.г. Тихон, и поглаварот на МПЦ-ОА, Архиепископот Охридски и Македонски г.г. Стефан, за првпат името на македонскиот архиепископ беше спомнато во диптихот на поглаварите на православните цркви. Овој чин, според канонското право, претставува официјална потврда на автокефалниот статус.
На литургијата, на која присуствуваа бројни македонски свештеници и верници од САД и Канада, сослужуваа архијереи и свештеници од повеќе помесни православни цркви, а молитвено присуствуваше и надлежниот Митрополит Американско-канадски г. Методиј.
По историската служба, во македонската амбасада во Вашингтон беше приреден свечен прием и средба со амбасадорот Зоран Попов.
Посетата на Архиепископот Стефан на САД е на покана на Митрополитот Методиј, по повод одбележувањето на 60-годишнината од осветувањето на храмот „Успение на Пресвета Богородица“ во Колумбос, Охајо. Неговата посета ќе продолжи во Канада, каде ќе присуствува на чествувањата по повод јубилејот на црковната општина „Свети Климент“ во Торонто.
