Исплатени 338 милиони денари за 9.567 овоштари
Над 9.500 овоштари добија финансиска поддршка од државата, откако се реализираше исплата од 338.468.141 денари за одржување на постојните овошни насади.
Од Министерство за земјоделство, шумарство и водостопанство информираат дека средствата се распределени на вкупно 9.567 корисници, во рамки на Мерката 1.6 – директни плаќања по обработлива површина. Оваа мерка има за цел да обезбеди континуирана поддршка за одржување и унапредување на овоштарското производство во земјава.
Со финансиската инјекција се овозможува стабилност во производството, зголемување на квалитетот и зачувување на постојните насади, што е особено значајно во услови на зголемени трошоци за производство.
– Продолжуваме посветено да ги поддржуваме вистинските земјоделци и да придонесуваме кон одржлив и конкурентен развој на македонското земјоделство – наведуваат од Министерството.
