Инженери сакаат да знаат дали се проверува колку се точни струјомерите
Здружението Инженери на Република Македонија поднесоа барање за пристап до информации од јавен карактер до Бирото за метрологија за тоа дали ветениот државен еталон за проверка на електрични броила сè уште не е ставен во функција.
Министерството за енергетика, рударство и минерални суровини пред четири месеци најави зголемување на заштитата на граѓаните и обезбедување поголема транспарентност при мерењето на потрошената електрична енергија. Од Бирото за метрологија во најкраток можен рок бепе побарано да ја стави во функција софистицираната опрема за тестирање и верификација на броилата, која повеќе од седум години останала неискористена. Станува збор за трофазен систем за мерење на електрична енергија и моќност, кој со години бил складиран во подрумските простории на Бирото. Со активирањето на оваа опрема требаше да се овозможи не само редовна верификација на мерилата, туку и проверка на нивната исправност по жалби од потрошувачи. Ова следуваше поради честите поплаки на граѓаните за сомнително фактурирање на електричната енергија.
– Иако министерката за енергетика пред три месеци јавно изјави дека опремата ќе биде активирана „во најкус можен рок“, јавноста сеуште е без никаква информација дали тоа е навистина реализирано, реагираат од здружението.
До барањето за информации од Бирото за метрологија испратени се прашања дали граѓаните можат да побараат проверка на своето броило? Колку поплаки за неточност се примени досега и со какви резултати? Кога последен пат е извршен надзор над работата на лабораторијата на ЕВН?
– Дополнително, побаравме и можност за посета на лабораторијата на Бирото, со цел директен увид во опремата, стандардите и методологиите што се применуваат, додаваат од Инженери на Република Македонија.
