Идниот онколог Шакиров: Ми ја украдовте мајка ми, ми го распарчивте детството и тоа никој не може да го врати!
По поднесувањето на обвиненијата во случајот „Онкологија“, во кој неколку лекари – онколози и поранешни директори на Клиниката за онкологија се товарат за сериозни кривични дела поврзани со злоупотреба на скапа терапија, со што свесно биле загрозени животите на пациентите, јавноста не престанува да реагира. На социјалните мрежи се појавуваат бројни потресни сведоштва на граѓани чии блиски починале од рак, а се лекувале токму на оваа клиника.
Со неверување и гнев, многумина споделуваат дека терапијата за нивните најмили била крадена, со што, како што велат, биле лишени од шанса за живот. Статусите се полни со болка, сомнежи и барање за правда.
Особено емотивна беше објавата на Елвин Шекиров, студент по медицина од Штип, кој својата иднина ја гледа токму во онкологијата. Неговата мајка починала пред седум години од рак на дојка, а според обвинението, еден од обвинетите лекари бил нејзиниот онколог.
– Ја отворам објавата за онкологија. И нешто ме гризе уште пред да почнам да читам.
Го чувствувам. Тој познат стег во градите. Тоа шепотење во мене: „Сега ќе те боли…“ И го читам името на онкологот кој ја „лекуваше“ мајка ми. И под него – студено, рамнодушно, како нешто да вреди помалку од човечки живот – „несоодветно лекувана“. Таа не беше бројка, таа не беше само дијагноза, таа беше лавица која се бореше до последната воздишка за своите деца. Поради вас…
Јас цел живот се чувствувам половично. Ми ја украдовте мајка ми. Ми го распарчивте детството. И тоа никој не може да го врати. Знам дека и покрај сето ова вие ќе си продолжите да си функционирате нормално и знам дека ништо нема да ви биде во овој свет, ама со сигурност знам дека ќе ви биде во еден друг свет каде што навистина постои правда и таа правда ќе ве стигне… Бидејќи вие оставивте многу деца без мајки, објави на својот Фејсбук профил Шакиров.
Од Основното јавно обвинителство вчера соопштија дека поранешните директори на Клиниката за радиологија и онкологија, медицинскиот Нино Васев и организацискиот Нехат Нухи се обвинети во две обвиненија во предметот на Основното јавно обвинителство „Онкологија“. Меѓу обвинетите во второто обвинение има уште тројца лекари онколози од Клиниката.
