ХРВАТСКИ ГРАД БАРА ПЕДИЈАТРИ ИТНО: Локалните власти нудат големи плати и ќе плаќаат кирија за стан од 500 евра

Копривница е соочена со недостиг од педијатри специјалисти
вработени на неопределено и со полно работно време во специјалистички ординации
за здравствена заштита на деца од предучилишна возраст.

„Поради недостиг од педијатриски специјалисти, загрозен е континуитетот
и достапноста на специјалистичка здравствена заштита за децата од предучилишна
возраст во областа Копривница, а се заканува и проблемот со неможноста за
нејзино натамошно обезбедување“, посочуваат од Градската управа.

Според тоа, мерките се насочени кон вработување на доктори
по медицина од областа на педијатријата на неопределено време, со полно работно
време во Здравствениот дом на жупанија и нивно задржување во работен однос.

Градот на педијатрите ќе им обезбеди стимулативен надоместок
во нето износ од по 13.272,28 евра или 100.000 куни годишно за секој лекар
специјалист, за секоја календарска година почнувајќи од оваа година.

Освен тоа, ќе ги финансираат и трошоците за изнајмување
стан. Така, специјалист педијатар вработен на неопределено време со полно
работно време има право на финансирање на трошоци за кирија до 500 евра (околу
3.800 куни) месечно, под услов да не поседува сопствен имот во Копривница.

Конкурсите за вработување ги спроведува Здравствениот дом на
Копривничко-крижевачката жупанија, информираат од градската управа на
Копривница. Седницата на Градскиот совет треба да се одржи во септември.