Хрватска ќе гради уште еден мост до островот Крк
Во Хрватска почнаа подготовките за изградба на уште еден мост на Крк. Ќе има два ката, едниот за патен, а другиот за железнички сообраќај, а само изработката на документацијата ќе чини околу 600.000 евра. Според проценките на „Хрватска автоцеста“, мостот би можел да биде изграден за пет години. Актуелниот мост е изграден во 1980 година и порано беше познат како „Титов мост“.
Агенцијата во вторник објави јавен тендер за изработка на документација за новиот мост на Крк. Конкурсот ќе биде отворен до 29 јануари. Проценките се дека ќе бидат потребни најмалку пет години за да се изгради мостот. Се очекува да ќе требаат три години за истражување на влијанието врз животната средина и изработка на документација, а две години за градежните работи. Во тендерот не е прецизирано каква ќе биде изградбата на мостот, но ќе се утврдува во фазата на подготовка на документацијата.
Ќе води до пристанишниот терминал во Омишље на Крк, кој допрва треба да го градат. Трасата ќе се движи јужно од сегашниот поврзувачки пат, а новиот мост, за разлика од постоечкиот, нема да го минува островот Свети Марко. Изградбата на вториот мост на Крк ја потврди и хрватскиот министер за поморство, транспорт и инфраструктура, Олег Бутковиќ.
„Откако го реновиравме постоечкиот мост на Крк пред две години, стратегијата за развој на транспортот планира да се изгради и овој втор, нов мост, вклучувајќи го и железничкиот“, рече тој.
Тој нагласи дека на Крк веќе ќе му треба втор мост, но по завршувањето на контејнерскиот терминал во Омишље потребите ќе бидат уште поголеми и стариот мост нема да биде доволен.
