Хрватите ни се реваншираа: Пораз на Македонија по пет сета во Задар (ФОТО)
За Македонија ова беше трет пораз на третото гостување, а пропуштена е шанса да се вратиме на второто место, откако македонските одбојкари во исклучително изедначениот тајбрејк поведоа со 12-10 во завршниот сет, но потоа попушти концентрацијата и по 13-13, Хрватска освои два поени за да го реши мечот.
Претходно Македонија го доби првиот сет со 25-20 во кој до освојувањето исчекорија на средина кога дојдоа до плус пет (17-12) и сѐ потоа беше рутински одработено, но Хрватска во вториот се врати со одлична игра во која од старт направија предност од пет разлика (8-3) и таа разлика ја одрживаа и ја надградија до плус седум (18-11) за да израмнат.
Во третиот сет Хрватска поведе во мечот откако по егалот 20-20, мини серија со 2-0 им овозможи предност и потоа сервис за сервис дојдоа до освојување за 2-1, а Македонија се реваншира со фантастичен четврти сет во кој ги прегази Хрватите. Им допуштивме само 15 поени, а клучната разлика ја направивме од 10-9 со серија 9-4 за големи 19-13.
Никола Ѓорѓиев со 22 поени беше најдобар кај Македонија, а со ист учинок Петар Дрилиќ беше најдобар кај Хрватите.
Но, во клучниот сет не издржавме на крајот, па сега остануваме трети со шест бода колку што има и втората Белгија, а Украина е убедлива со пет од пет и максимални 15 бода пред доаѓање на Украинците во Скопје во последниот меч од групата.
