Хорор во Полска: Жена која исчезна пред 27 години е пронајдена во соба на станот на родителите
Пред повеќе од 27 години, во полскиот град Свјетохловице, соседите во зградата дознале од брачен пар дека нивната 15-годишна ќерка Мирела исчезнала. Нејзината судбина останала непозната сè додека неодамна не се појавила ужасна приказна за злоупотреба.
„Приказната е толку неверојатна што е тешко да се поверува“, изјави Иза од Свјетохловице за полскиот медиум „Факт“.
Во јули, соседите пријавиле во полицијата звуци што доаѓале од станот на родителите. Кога полицијата влегла во станот, ги пронашла родителите, кои биле во своите 80-ти години, и 42-годишната Мирела, која била во многу лоша состојба.
„Родителите на почетокот не сакале да ја отворат вратата. Им кажале на полицијата дека живеат сами и дека не е потребна никаква интервенција. По некое време, ја отвориле“, изјавиле соседите за „Факт“.
Според нив, жената изгледала крајно запоставена, а имала рани на нозете. „Се наеживме кога ја носеа. Не можеше сама да се симнува по скалите. Нејзините родители ја држеле во станот 27 години“, рекоа тие.
Според директорот на службата за итни случаи во Катовице, жената им рекла дека не излегла од куќата повеќе од 20 години. Подоцна се покажало дека двојката им кажала на некои соседи дека Мирела всушност отишла да живее со своите биолошки родители.
Случајот доби внимание во полската јавност откако граѓаните започнаа онлајн кампања за собирање пари за Мирела, за да ѝ се овозможи целосно да се опорави физички и психички.
Пријателите на Мирела, кои се сеќаваат на веселата и безгрижна тинејџерка од крајот на 90-тите, тврдат дека таа била заклучена во мала соба и не можела да одржува основна хигиена. Според полските медиуми, нејзиното исчезнување никогаш не било пријавено во полиција.
По нејзиното ослободување, таа поминала два месеци во болница. Таа имаше рани на нозете кои се инфицирале поради изложеност на измет и урина, а лекарите рекоа дека била „на неколку дена од смртта“. Полските медиуми, исто така, објавија дека семејството не е во системот на Центарот за социјална работа.
ТВП3 објави дека Мирела се вратила во станот на нејзините родители и дека сè уште не се поднесени кривични пријави против нејзините родители. Полицијата соопшти дека прелиминарната истрага не утврдила со сигурност „дека жената била држена во станот против нејзина волја“.
Полските медиуми објавија дека случајот ја шокирал јавноста, бидејќи никој не разбирал како таква драма можела да се одвива зад затворени врати во станбена зграда 27 години.
