Холандската влада падна поради имиграциската политика
Холандската влада денеска падна бидејќи не е постигнат договор за ограничување на имиграцијата, потврди Христијанската унија, една од четирите членки на владејачката коалиција.
„Четирите партии одлучија дека не можат да постигнат договор за миграцијата. Затоа, одлучија да го прекинат мандатот на оваа влада“, изјави партискиот портпарол Тим Куестен.
Тој со тоа го потврди извештајот на холандската новинска агенција АНП, која објави дека премиерот Марк Руте ќе поднесе оставка од неговиот кабинет бидејќи не е постигнат договор за мерките за ограничување на имиграцијата.
Кризата настана по обидот на конзервативната Народна партија за слобода и демократија (ВВД) на Руте да го ограничи протокот на баратели на азил во Холандија, ги подели четирите партии од владејачката коалиција, бидејќи две помали партии одбија да го поддржат предлогот, пренесува Танјуг.
Тензиите дојдоа до врвот оваа недела, кога Руте побара поддршка за предлогот да се ограничи влезот на децата на воените бегалци кои веќе се во Холандија и да се бара од семејствата да чекаат најмалку две години пред да се обединат.
Поради овој предлог, Христијанската унија одлучи да ја напушти владата, што предизвика криза.
Холандија веќе има една од најстрогите имиграциски политики во Европа, но под притисок на десницата, Руте со месеци се обидуваше да најде начин дополнително да го намали приливот на баратели на азил.
Бројот на барања за азил во Холандија се зголеми за една третина минатата година на повеќе од 46.000, а владата предвиде дека тој број може да се зголеми на повеќе од 70.000 оваа година, надминувајќи го рекордот поставен во 2015 година.
