ХАЈРЕДИНИ МУ РЕПЛИЦИРАШЕ НА БЕСИМИ – Поддршката за струјата ја плаќаат граѓаните
Поранешниот министер за финансии, Џевдет Хајредини, преку својот Фејсбук профил му реплицираше на актуелниот министер за финансии, Фатмир Бесими на тема енергетика.
– Владата ќе продолжи да го поддржува АД ЕСМ со цел да не поскапи струјата за граѓаните, порача вечерва министерот за финансии Фатмир Бесими.
xxx
И таа поддршка ќе ја плаќаат граѓаните, не Владата – напиша Хајредини.
Темата за енергијата, особено цената на струјата деновиве е актуелна, по најавата на претседателот на Регулаторната комисија за енергетика, Марко Бислимовски, дека можно е зголемување на цената на струјата од дури 13 проценти, ако се прифатат барањата на енергетските компании.
Министерот Бесими синоќа во телевизиско гостување посочи дека Владата ќе продолжи да ја поддржува ЕСМ со цел да не поскапи струјата за граѓаните.
– Во Буџетот на годинава се предвидени 225 милиони евра за поддршка на граѓаните и стопанството за справување со кризата од кои дел се наменети за ЕСМ – рече Бесими во емисијата „Вин-вин“ на ТВ Телма.
Посочи дека во текот на изминатата грејна сезона на ЕСМ од Буџетот му беа префрлени вкупно 320 милиони евра за да не поскапат струјата и парното, а со намалувањето на ДДВ-то како поддршка за пониски сметки беа одлеани дополнителни 70 милиони евра или вкупно речиси 400 милиони евра за да не се зголемат цените на енергентите.
– Сметам дека е добро што во сметките за електрична енергија што ги добиваат граѓаните стои колкава е субвенцијата што ја добиваат, бидејќи тоа се нивни пари кои доаѓаат од даноците што ги плаќаат. Граѓаните треба да знаат каде се трошат нивните пари, а само политика на Владата е да ја даде субвенцијата. Сметам дека во сметките за оваа година треба да стои и европското знаме, бидејќи од Европската Унија како грант ни се доделени 84 милиони евра за справување со енергетската криза – укажа минстерот.
