Грозданов: Лажните активисти свесно ја осиромашуваат Македонија поради личен ќар од антизападни центри

Аналитичарот и металуршки инженер Виктор Грозданов во колумната насловена „Рударската иднина е конечна и државотворна“ пишува дека стопирањето на одливот на мозоци од Македонија е прашање за иднината на татковината, а не нечиј моментален проект за наплаќање хонорари. Тој во овој контекст ги споменува еко-активистите кои се противат на отворањето на рудници и според него тие одработуваат туѓи агенди. Сепак, Грозданов не ги изостави и политичарите.

– Постојат и личности како Министерката за труд и социјална политика, родум од Струмица, која е убедена дека ќе печали 100 гласови плус за својот СДСМ ако популистички крикне „Јас рудник не дозволувам да се изгради во Струмичката котлина“. Ова нема врска со еко туку исклучиво во политички активизам. Затоа, сега наметнувам една дилема поврзана со ресорот труд и социјала. По прашање на преваленцијата на попреченоста, Светската Здравствена Организација (World Health Organization – WHO) проценува дека 15 % од светската популација има некоја форма на попреченост, од кои 2-4 % имаат значителни тешкотии во секојдневното функционирање. Користејќи ги последните достапни информации за бројот на населението во Македонија и аплицирајќи го светскиот процент, согласно оваа формула, произлегува дека 303.382,00 граѓани во Македонија имаат некаква попреченост. Клучното прашање е како државата успешно да им го олесни животот на оваа категорија наши сограѓани. Со предизборен популизам или со системски решенија за кои се неопходни пари?, истакнува Грозданов.

Според аналитичарот, токму од овие причини како држава мораме да вложуваме во здравјето на целата нација и да вложуваме во заштитата на нашите деца.

-Ако можевме ние да останеме во Македонија и да вложуваме во нашата среќа зошто пак други да заминат. Мудра држава изнаоѓа начини како да привлече инвеститори кои заработуваат милијарди и имаат желба да инвестираат дел од нивните пари во Македонија. Нашите аргументи се многу едноставни. Имаме рударска металична жица која поминува низ територијата на Источна Македонија, со застапеност на бакар како руда со вредност од 20 милијарди евра, додава Грозданов.

Тој истакна дека доколку се преработува оваа руда кај нас, во нашата држава, проценката на интелектуално-образованите професори е дека вкупната инвестиција и потенцијална заработувачка е 70 милијарди евра.

-Дали можете да замислите што значат 70 милијарди евра? И тоа не било каде, туку во Македонија. Зарем не е убавина нашите деца од Струмиченца, се извинувам Пјаченца да се вратат кај своите блиски. Да не спијат по пет луѓе во иста соба во туѓина и единствена забава да им биде во сабота кога можат да воздивнат и да испазарат намирници кои ги имаат и во Македонија. Па замислете мајка и внуците од синот кој е во близина со својот татко, брат, зет итн. Наместо тоа ние си имаме лажни екологисти кои залутале во своите умствени авантури, а кои немаат никаква врска со реалноста и кои одработуваат за да не се случат опишаните средби помеѓу мајка и син, потенцира аналитичарот.

Според Грозданов, како што ги нарекува, лажните активисти одработуваат младото работоспособно население да остане во туѓина.

-Овие личности кои немаат реализирано детство ама имаат несреќен приод кон младоста ги бркаат струмичани од најмалку две причини: заради свесно осиромашување на Македонија со измислени панични сценарија по здравјето на граѓаните, животната средина и земјоделието; заради лични привилегии и ќар ползуван од антизападни центри на моќ кои делуваат со политичко-безбедносна агенда во која предизвикување арбитражни постапки со астрономски отштети на товар на државните буџети се составен дел, смета Грозданов.