Грипот доцни, но зема залет – пикот се очекува во февруари, загадувањето дополнително ги полни амбулантите
Наместо во ноември, грипот годинава „задоцни“ и почна интензивно да се шири дури во втората половина на декември. Д-р Сања Цилевска Младеновска од вакциналниот пункт во поликлиниката „Букурешт“ вели дека изминатиов период доминирале настинките и други вирусни инфекции, особено кај најмладите, кои се прелевале една во друга. Сепак, вистинскиот грип сега чука на врата.
„Искрено, оваа година, баш и со колегите коментираме дека некако покасно почна. Вие сме навикнати веќе на оние големи гужви, редици во амбулантите уште од ноември месец. Меѓутоа, сега некако полека почнува, значи втората половина на декември да се создава оној зголемен број на заболени деца“, вели д-р Сања Цилевска Младеновска
Освен вирусите, големиот број на пациенти е директна последица и на надворешните фактори. Наглото заладување на температурите, комбинирано со високото ниво на аерозагадување, ги прави децата посебно ранливи (вулнерабилни). Лекарите очекуваат кратко смирување на состојбата за време на училишниот распуст, но предупредуваат дека најлошото допрва доаѓа со почетокот на второто полугодие.
„Очекуваме сега малку со распустот тоа да се смири. Меѓутоа, како и секоја година, знаеме дека со тргнувањето на учениците во второ полугодие, после празниците, пак следи оној пик. Пикот на грипот е секогаш најголем во февруари. Тоа е така секоја година и оваа не би била исклучок“, вели д-р Сања Цилевска Младеновска
Вакцинацијата, која е најдобра заштита, започна уште на 16 октомври. Досега се вакцинирани околу 78.000 граѓани. Иако интересот кај родителите за вакцинирање на децата расте од година во година, докторката вели дека тоа сè уште не е на посакуваното задоволително ниво.
Лекарите апелираат на внимателност за време на празничните патувања и собирите во затворени простории, кои се идеални за ширење на инфекциите.
