Грчкиот инвеститор се жали, од министерството бараат да не се шират дезинформации за „Чебрен“

Од Министерството за животна средина велат дека постапката за доделување на концесија за ХЕЦ Чебрен продолжува понатаму. Ваквото соопштение следи откако во телевизиските медиуми излезе информација дека избраниот инвеститор – грчки ППЦ Архиродон се пожалил на условите од одлуката на Владата, која за нив била поразлична од она што се барало на тендерот за концесија.

Наводно, до 15 декември требало да се склучи договорот за концесија со грчкиот оператор, но тоа нема да се случи утре. Се разгледува жалбата и може да се одолговлечи проектот. Од друга страна, надлежното министерство вечерва излезе со реакција во јавноста.

„Тендерската постапка за доделување на концесија за ХЕЦ Чебрен кој што е инфраструктурен проект од исклучителна важност за државата, е се уште во тек. Од таа причина Министерството за животна средина и просторно планирање ја замолува јавноста и медиумите да не се шират дезинформации и да не се пренесуваат погрешно изјави поврзани со овој процес, од технички, правен или финансиски аспект. По завршувањето на процесот јавноста ќе биде благовремено информирана“, реагираат од министерството.

Досега имало 11 неуспешни тендери во последните 20 години за овој проект.