„Градот убав повторно блесна“: Орце Ѓорѓиевски ја запали елката и го отвори Божиќниот маркет – крај за празничното сивило во Скопје

Со свечено палење на светилките на новогодишната елка и официјалното отворање на Божиќниот маркет, вечерва во Скопје и официјално започна празничната магија. Градоначалникот Орце Ѓорѓиевски, пред голем број присутни граѓани и деца, порача дека по долги години, главниот град конечно го добива сјајот што го заслужува.

Плоштадот вечерва беше центарот на случувањата, каде масовното присуство на скопјани го означи крајот на она што Ѓорѓиевски го нарече „години на сивило“.

Во своето обраќање, градоначалникот не го криеше задоволството од атмосферата и енергијата на присутните.

Тој додаде дека оваа церемонија не е само обичен настан, туку чекор напред кон визијата Скопје да се развива рамо до рамо со современите европски метрополи, преку настани што носат заедништво.

Градоначалникот најави дека оваа вечер ќе остане запишана во историјата и вети дека организацијата на ваков Божиќен маркет ќе прерасне во традиција.

„Време е Скопје повторно да живее со светлина, насмевки и празнична топлина“, порача Ѓорѓиевски, заблагодарувајќи им се на граѓаните што ја направиле ноќта посебна.