Грац: Бројот на жртвите од масакрот во училиштето се искачи на 11
Универзитетската болница во Грац потврди дека едно возрасно лице им подлегнало на тешките повреди здобиени при масовното пукање што се случи утрово во гимназијата БОРГ, со што бројот на загинати се искачи на 11 лица.
Меѓу жртвите се и ученици и наставници. Според официјалните информации, нападот започнал рано утринава, кога 21-годишен маж отворил оган врз присутните, при што усмртил девет лица, потоа се самоубил, а најмалку 28 лица се повредени, дел од нив со сериозни повреди.
Австриските власти прогласија тридневна национална жалост, а знамињата се спуштени на половина копје. Наставата во училиштата во регионот е прекината, а на местото на настанот се присутни силни полициски и медицински екипи.
Истражните органи сè уште работат на расветлување на мотивите за нападот. Семејствата на жртвите добиваат психолошка поддршка, а јавноста е повикана на воздржаност и почит кон трагично загинатите.
