Граѓани бараат пелети, ниските температури ја вратија потребата од греење на крајот од мај

Иако календарскиот крај на мај обично носи потопло време, овие денови многу граѓани повторно ги вклучија греалките. Поради невообичаено ниските температури, во дел од земјата повторно се почувствува потреба од затоплување на домовите – што доведе до зголемена побарувачка на пелети и други енергенси.

Продавачите на пелети велат дека дел од граѓаните веќе ја потрошиле залихата што ја оставиле од зимскиот период, а нова не очекувале дека ќе им биде потребна во овој дел од годината.

„Не сме навикнати на вакво време во мај. Луѓето доаѓаат по вреќа-две – доволно за неколку денови“ вели продавач од Скопје.

Метеоролозите најавуваат стабилизација на времето дури кон крајот на следната седмица, со што се очекува повторно враќање на повисоки температури.