Горан Трајковски: Јогурт од еден килограм се продава како еден литар

Директорот на Државниот пазарен инспекторат Горан Трајковски ги предупреди производителите и трговците на јогурт дека ќе има казни поради манипулација на потрошувачите, затоа што производот се прикажува дека е еден литар а има помалку зафатнина.

– Точно е тоа дека литар јогурт се продава со маса од еден килограм. Но еден килограм е помалку од тоа што зафаќа еден литар. Во овој случај полнењето е само околу 950 милилитри. Тоа е заблуда за потрошувачите, а ние како институција нема тоа да го дозволиме, порача Трајковски во вестите на Телма.

Трајковски често порачува дека ДПИ трпи притисоци поради изречените казни, особено со донесените мерки за ограничување на профитните маржи на 73 прехранбени производи. Изречени се глоби од 4 милиони денари во повеќе градови низ земјата.