Горан Ташков назначен за нов директор на „Холидеј Ин“
Новиот претседател на Управниот одбор на „Македонијатурист“, Горан Ташков, е назначен за нов директор на хотелот Холидеј Ин Скопје. Тој на оваа позиција доаѓа на местотот на Ана Таневска – Ѓорѓиевска, ќерката на Доне Таневски, кој претходно беше долгогодишен доминантен акционер на компанијата.
Ташков важи за експерт во областа на хотелиерството, со долгогодишна успешна кариера во таа сфера. Во составот на Управниот одбор на „Македонијатурист“, покрај Ташкјов, се и Маја Николовска и Ацо Дудулоски. Именувани се претходно од страна на Надзорниот одбор.
Ако последниопв период беше бурен за некоја компанија што котира на Македонската берза, тоа секако дека е „Македонијатурист“. Таму, преку продажба и купување на акции настана целосен сопственички пресврт, откако неколку струи амбициозно купуваа акции, а продаваше дотогаш најголемиот долгогодишен акционер Доне Таневски, како и неколку други акционери од старата постава.
Ташков има повеќедецениско искуство стекнато во неколку компании. Во неговото CV е забележано дека повеќе од 12 години бил член на Одборот на директори на Хотели Метропол Охрид, исто толку време менаџирал со хотелот Александар Палас од заменичката и од директорската функција, бил заменик директор на DoubleTree by Hilton, генерален менаџер нa ЕРАК Груп, па прв човек на Park Hotel & Spa.
