Голем ракетен напад врз Украина, Полска подигна борбени авиони
Украинските власти прогласија воздушна тревога низ целата земја во средата наутро поради крстосувачки ракети кои се закануваат на делови од територијата, еден ден по големиот напад на украинските сили врз неколку руски региони.
На својот профил на Телеграм, воздухопловните сили зборуваат за проектилите истрелани врз градот Криви Рих, родното место на претседателот Володимир Зеленски, во централна Украина, како и во регионите Чернихив (север), Полтава (центар) и Миловаев (југ), пренесува N1 Хрватска.
Истиот извор додаде дека е откриена и „група крстосувачки ракети“ насочени кон Киев.
Речиси три години по почетокот на рускиот напад, Киев и Москва ги засилија нападите во последните месеци и се обидуваат да ги подобрат своите позиции пред Доналд Трамп да се врати во Белата куќа следниот понеделник.
Новоизбраниот американски претседател рече дека сака да работи на завршување на војната веднаш штом ќе ја преземе функцијата.
Украина објави дека во понеделникот вечерта го извршила „најмасовниот“ напад од оваа војна врз воени и индустриски капацитети во неколку региони на Русија.
Според руското Министерство за одбрана, нападот бил извршен со помош на шест американски ракети ATACMS и шест британски ракети Storm Shadow.
Министерството соопшти дека сите ракети биле соборени без жртви.
Украинската електроенергетска компанија исто така објави дека во шест региони е спроведен итен прекин на електричната енергија поради „масовниот“ руски ракетен напад.
Во соопштението, Укренерго наведува дека прекини на електрична енергија биле спроведени во регионите Харков, Суми, Полтава, Запорожје, Днепропетровск и Кировоград.
