Георгиев: Бугарија останува на позициите од 2022, без нови услови за Македонија
Бугарија ја поддржува европската перспектива на Западен Балкан, но членството во Европската Унија мора да се темели на принципот на сопствени заслуги, изјави бугарскиот министер за надворешни работи Георг Георгиев, коментирајќи го вчерашното одложено гласање за извештајот за Македонија во Комитетот за надворешни работи на Европскиот парламент.
„Членството не се дава автоматски. Потребно е исполнување на јасни и конкретни критериуми“, нагласи Георгиев. Тој додаде дека Бугарија е конструктивен партнер и дека останува посветена на консензусот постигнат во јули 2022 година.
Гласањето за извештајот за напредокот на Северна Македонија беше одложено по предлог на европратеникот Томас Вајц, информира БГНЕС.
Според Георгиев, важно е да се потенцира дека Бугарија нема намера да поставува дополнителни услови за евроинтеграцијата на Северна Македонија, но очекува доследно почитување на договореното, особено во однос на Договорот за добрососедство и Протоколите.
Во сличен тон, Тома Биков од партијата ГЕРБ-СДС изјави дека очекуваат напредок кон ЕУ само доколку, како што рече, „антибугарските и антиевропските сили не ја водат државата“.
Минатата недела, бугарскиот парламент усвои резолуција со која повторно ја потврди својата поддршка за европскиот пат на Македонија, но и обврската за строго почитување на договорите од страна на Скопје.
