ФОТО Милијарди загуби и запуштени капацитети го тераат „ЕЛЕМ турс“ кон финансиски колапс
Државниот завод за ревизија во денешното соопштение за медиуми укажува на сериозни финансиски и оперативни неправилности во работењето на Друштвото за туризам, угостителство, рекреација и спорт „ЕЛЕМ турс“ ДООЕЛ Скопје за 2023 година. Ревизорите констатирале дека загубите од основањето во 2012 година достигнале 1,197 милијарди денари, што изнесува 92% од основниот капитал на друштвото.
И покрај тоа што загубата во 2023 е најмала во последните шест години, друштвото останува нетечно и продолжува да создава заостанати обврски. За подмирување на долг, „ЕЛЕМ турс“ континуирано склучува трипартитни договори со својот основач, АД ЕСМ Скопје. Само во 2023 година, друштвото пренесло нов долг од 180,902 илјади денари, додека вкупните обврски пораснале на 268,382 илјади денари.
Ревизијата открила и нерационално трошење на јавни средства: во август 2022 година е склучен аутсорсинг-договор вреден 20 милиони денари, но реално се исплатени 34 милиони денари – зголемување од 70% над договорената вредност. Дополнително, ангажманот на надворешни извршители за време на ниска активност на сместувачките капацитети не бил оправдан и не е документативно поткрепен.
Од теренскиот увид на шест објекти – меѓу кои „Молика“ (Битола), „Попова Шапка“ (Тетово) и „Свети Стефан“ (Охрид) – ревизорите забележале дека, освен хотел „Молика“, сите објекти се старeни и не ги исполнуваат минималните технички услови за безбедно сместување. Најкритично е во „Свети Стефан“, каде објектот е исклучен од мрежа, додека „Ливадиште“ (Струга) е во фаза на реновирање.
Ревизорите исто така посочуваат дека за градежните објекти и опрема во вкупна вредност од 284,377 илјади денари не е спроведена постапка за осигурување од опасности како пожар или кражба, што дополнително го изложува друштвото на финансиски ризици. За да се заменат констатираните слабости, ревизорите предложиле конкретни мерки за унапредување на управувањето, рационализација на трошењето и зајакнување на контролата во постапките за јавни набавки.
