Филипче: Никој не е заинтересиран од потпреседателите во СДСМ да ја задржи партиска функција

Лидерот на СДСМ, Венко Филипче, најави целосна консолидација и кадровско освежување на партијата кое ќе се официјализира овој вторник. Во гостувањето на Телевизија Сител, тој демантираше дека е осамен на „Бихаќка“ и најави формирање на „нова сила“ составена од комбинација на искусни и млади кадри.

Според Филипче, процесот на промени влегува во финална фаза. „Оставките не се констатирани, тие ќе се констатираат во вторник. Тогаш ќе се изберат новите потпретседатели и новите членови на Извршниот одбор. Практично, создаваме една нова сила во партијата“, изјави Филипче.

На прашањето дали веќе ги има имињата на новите соработници, претседателот на СДСМ потврди дека списокот е веќе подготвен, но побара трпение од јавноста до вторник за официјалното објавување.

Во однос на актуелните функционери и нивната иднина, Филипче истакна дека во партијата постои висок степен на политичка свест. „Другарите и другарките покажаа дека апсолутно никој не е заинтересиран по секоја цена да задржи партиска функција. Сите тие се почитувани членови и верувам дека ќе го дадат својот придонес и без функција“, рече тој.

Филипче најави дека новиот состав ќе отвори широк фронт против, како што ја нарече, „широката корупција на власта“, вклучувајќи и соработка со граѓанските организации.

Тој упати остри критики кон владејачкото мнозинство, обвинувајќи ги за обид за враќање на минатото.