ФБИ СО ЧЕСТИТКИ ДО МАКЕДОНСКАТА ПОЛИЦИЈА ЗА АКЦИЈАТА ПРОТИВ МЕЃУНАРОДЕН САЈБЕР КРИМИНАЛ Тошковски е горд на работата на полициските службеници
Јавното признание од Федералното истражно биро (ФБИ) за резултатите на македонската полиција е потврда дека посветеноста, професионалноста и меѓународната соработка даваат конкретни резултати, објави министерот за внатрешни работи Панче Тошковски на Фејсбук.
Осврнувајќи се на успешното апсење на администраторот на криминалната платформа OLVX, реализирано во соработка со ФБИ, Тошковски истакна дека случајот ги потврдува оперативните капацитети на македонската полиција во борбата против транснационалниот сајбер-криминал.
– Успешното апсење на администраторот на криминалната платформа OLVX, реализирано во соработка со ФБИ, покажува дека македонската полиција има оперативен капацитет да биде рамноправен и доверлив партнер во борбата против транснационалниот сајбер-криминал – наведе Тошковски.
Тој вели дека е горд за работата на полициските службеници кои учествувале во акцијата, нагласувајќи дека нивната стручност и посветеност се клучни за постигнатиот успех.
– Особено сум горд на нашите полициски службеници, чија стручност и посветеност стојат зад овој успех. Ова признание е за нив. А наша обврска е да продолжиме да ги зајакнуваме капацитетите на македонската полиција и да ја оправдуваме довербата на нашите меѓународни партнери – посочи Тошковски.
ФБИ им честита на партнерите од Единицата за компјутерски криминал при Бирото за јавна безбедност на Северна Македонија во Министерството за внатрешни работи за успешното апсење на администраторот на криминалниот пазар OLVX.
„Активен помеѓу 2023 и 2025 година, OLVX се товари дека незаконски продавал лични идентификациски податоци на жртви („ПИИ“) и акредитиви за најава преку повеќе од 1.500 сметки на продавачи. Постоењето на овој пазар директно ја загрози дигиталната безбедност на илјадници американски граѓани кои се потпираат на интегритетот на сметките што ги користат.
Ова разбивање ја означува првата сајбер операција координирана меѓу ФБИ и Северна Македонија и ја одразува посветеноста на ФБИ за работа со партнерите ширум светот за заштита на американскиот народ во сајбер просторот“, е наведено во честитката од ФБИ.
.
Извор: plusinfo.mk
