ЕВЕ КАДЕ ЌЕ МОЖЕ ДА СКИЈАТЕ ВО ЕВРОПА: Експертите предвидуваат каде ќе падне снег, на некои скијачки центри можете да заборавите
Скијачките центри во Европа би можеле да се соочат со „мрачна иднина“, се предупреди во извештајот објавен минатата недела. Топлото и непредвидливо време во последните години ги остави планините без снег – тренд кој веќе влијае на овогодинешната скијачка сезона.
Имено, неодамна уште едно француско одморалиште донело тешка одлука засекогаш да ги затвори ски-лифтовите поради недостиг на снег, намален број посетители и зголемени долгови.
Француските одморалишта не се единствените кои се борат со проблеми: високите температури минатиот февруари ги погодија и скијачките градови во Австрија, Босна и Херцеговина, Италија, Шпанија и Швајцарија. Најмногу настрадаа оние на пониските и средните надморски височини, што доведе до преоптоварување на скијачките центри кои се наоѓаат на повисоките места.
По најжешкото лето во историјата, се поставува прашањето дали овој негативен тренд ќе продолжи и во текот на зимата 2024/25? Еве како изгледа прогнозата за овогодинешната скијачка сезона во Европа.
Зошто европските скијачки центри се соочуваат со проблеми?
Главната причина за порастот на температурите во Европа се климатските промени. Меѓутоа, во 2024 година, овој ефект е засилен со природниот феномен Ел Нињо, кој во Пацификот предизвикува топлите води да се движат кон исток, носејќи со себе прекумерна топлина. Како што излегуваме од овој климатски систем, се очекува доаѓањето на Ла Ниња, која за разлика од Ел Нињо има ефект на ладење.
Тоа би можело да ја направи оваа зима поладна од минатата – но дали ќе биде доволно за заживување на скијачките центри во Европа?
Според Метеоролошката канцеларија, Ла Ниња може да ги зголеми врнежите, што потенцијално ќе донесе пообилен и почест снег. Овој временски систем обично носи студен почеток и благ крај на зимата во Западна Европа – така што скијачите би било мудро да ги планираат своите одмори на почетокот на оваа година. Сепак, влијанието на Ла Ниња е тешко да се предвиди бидејќи може да биде предмет на други глобални климатски фактори. Минатиот месец француската метеоролошка станица Метео Франс објави тригодишна прогноза која дава само 20 отсто шанси периодот од октомври до декември да биде постуден од вообичаеното, додека веројатноста е 40 отсто да биде потопол од просекот.
Каде да скијате во Европа оваа зима?
Дури и да се подобрат условите оваа зима, ќе биде доцна за некои одморалишта кои со години страдаат поради намалените снежни врнежи. Grand Puy и Alpe du Grand Serre во Франција веќе мораа да се затворат поради економски загуби. Вљубениците во зимските спортови треба да се одлучат за скијачки центри на поголема надморска височина како што се Авориаз, Тињ, Вал д’Изер и Вал Торенс во Франција, кои треба да се отворат на крајот на ноември.
За претходен почеток на сезоната, можете да ги посетите скијачките центри Леви и Рука во Финска, кои се отворени од 4 октомври или глечерот Кицштајнхорн во Австрија, кој ја започна сезоната на 5 октомври. Исто така во Австрија, Зелден планира да отвори скијачка област во средината на ноември, додека Ишгл, познат по својата долга и сигурна сезона, се отвора кон крајот на ноември.
Diavolezza во Швајцарија треба да биде отворена на 19 октомври, додека Cervinia, на 2.050 метри надморска височина во северозападните италијански Алпи, се смета за безбедна снежна точка и е планирано да се отвори на 26 октомври.
Зошто треба да одите на скијање со воз?
Со оглед на непредвидливата иднина на европските скијачки центри поради климатските промени, сега е поважно од кога било да се земе предвид еколошкиот отпечаток на патувањето. Енергетските и водните ресурси потребни за управување со лифтови, снежни топови и хотели веќе го прават скијањето активност со висока содржина на јаглерод. Сепак, помеѓу 50 и 80 проценти од емисиите од скијачката индустрија доаѓаат од патници кои доаѓаат и заминуваат од одморалиштата.
За среќа, постои поодржлива опција од летање и возење, а тоа се возовите. Земјите од Европа се многу добро поврзани со железница, па со ова превозно средство можете да посетите некои од најпознатите места за скијање.
