ЕСМ СО КРИВИЧНА ПРИЈАВА ДО ФИНАНСИСКА ПОЛИЦИЈА И МВР: Поранешни членови на управни и надзорни одбори и високи функционери од претходната Влада направиле штета од 5 милиони евра
Компанијата Електрани на Северна Македонија (ЕСМ) поднесе кривични пријави до Финансиската полиција и Министерството за внатрешни работи против поранешни членови на управни и надзорни одбори, како и против високи функционери од претходната Влада.
Пријавите се поднесени за одлуки поврзани со закуп на капацитет за гас во ЛНГ-терминалот во Александрополис, Грција – капацитет што, според ЕСМ, не можел да се користи и предизвикал штета од над 5 милиони евра.
„Согласно член 353 од Кривичниот законик, тие несовесно постапувале и не ги штителе интересите на компанијата и на државата“, изјави генералниот директор на ЕСМ, Лазо Узунчев, на денешниот брифинг со енергетските компании ЕСМ, МЕПСО и МЕМО.
Штетата, како што информираа, произлегува од закуп на прекуграничен капацитет и ангажман во гасниот терминал, за што компанијата месечно плаќала над 250 илјади евра. Узунчев рече дека договорот бил потпишан од страна на претходната влада, а меѓу пријавените, според информации на Телма, е и поранешниот вицепремиер за економски прашања Фатмир Битиќи, кој за медиумот изјави дека не е запознаен со пријавата, но дека целата документација е транспарентна и достапна во Владата и во ЕСМ.
Од претходната влада тврдат дека проектот имал регионално значење и дека бил планиран како дел од стратешко снабдување со гас од повеќе извори, во кој биле вклучени и Србија и Бугарија.
Во услови на тешка финансиска состојба, ЕСМ најави ново задолжување од 30 милиони евра од домашна банка, со камата до 3,5 проценти, за покривање на доспеани обврски. Договорот се очекува да биде потпишан следниот понеделник. Лани компанијата веќе се задолжи за 82 милиони евра на домашниот пазар, средства што се речиси целосно искористени.
И покрај финансиските проблеми и намаленото производство на електрична енергија во првиот квартал, од ЕСМ очекуваат годинава да завршат со позитивна финансиска нула.
„И еден цент добивка ако оствариме, тоа ќе биде добро“, рече Узунчев.
Цената на струјата за домаќинствата засега останува непроменета – 62 евра за мегават-час, а одлуката за евентуални корекции треба да се донесе неделава. Според последниот извештај, загубите на ЕСМ надминуваат 120 милиони евра, а компанијата продолжува да се бори со ликвидноста.
