ЌЕРКАТА НА СВЕТО ЈАНЕВСКИ, ДРАГАНА, ПО САМО ТРИ МЕСЕЦИ ОД НАЗНАЧУВАЊЕТО, Е ОТПОВИКАНА – повеќе нема да биде членка на Одборот на директори на „Тиквеш“

После само три месеци откако стана членка на Управниот одбор на винарската визба „Тиквеш“, Драгана Јаневска, ќерка на Светозар Јаневски, поверќе нема да биде на таа позиција. 

За тоа извести компанијата преку ценовно чувствителна информација испратена до инвеститорската јавност преку Македонската берза. 

„Согласно Глава 6 од Правилата за котација, известуваме за следниве измени во органите на управување: По Одлука од седница на Надзорен Одбор отповикани се двајца членови на Управниот одбор на Акционерско друштво за производство и промет на вино Винарска визба -Тиквеш експорт–импорт АД-Кавадарци и тоа Љупчо Крстевски и Драгана Јаневска“, се вели во кусата објава како ценовно чувствителна информација. 

Инаку, како што веќе пишуваше Фактор, во првата половина на април оваа година, двете деца на Светозар Јаневски, Драгана Јаневска и Јане Јаневски, станаа директори во успешната компанија која ја создаде овој познат бизнисмен, винарската визба „Тиквеш“.

Тоа беше објавено на Централниот регистер, а се наведе дека како одлука е донесено од Управниот одбор на компанијата на 29 март оваа година.

Па така, Драгана Јаневска, ќерка на Светозар, која е магистер по сајнс маркетинг, стана членка на Одборот на директори на АД „Тиквеш“ Кавадарци, а исто така член во Одборот на директори стана и Јане Јаневски, еден од двата сина на Светозар, кој е дипломиран економист, како што е наведено во Централниот регистер.

Додека, пак, член на Управниот одбор тогаш престана да биде Џон Кирил Јоновски, со потекло од Австралија, кој своевремено имаше купено и одредена количина акции од оваа успешна компанија.

Мнозински и доминантен сопственик на ВВ Тиквеш Кавадарци е трговското друштво за инжинеринг и услуги во прометот М-6 ДОО Скопје, кое поседува 80,8 отсто проценти од Тиквеш. Оваа компанија има и други акционери, но никој од нив нема пакет од над 5 отсто. Всушност, компанијата има уште 434 акционери домашни физички лица, кои вкупно поседуваат 14,32 отсто од акциите на визбата, и уште девет фирми акционери, кои располагаат со вкупно 6,36 проценти од акциите на компанијата.