Екс директорот на геријатрија и негувателот не се чувствуваат виновни за примањето мито од 20 илјади евра
Поранешниот директор на геријатрија, Мухсин Арифи, и негувателот Блерим Амити денеска пред Кривичниот суд изјавија дека не се чувствуваат виновни за случајот во кој се обвинети за примање мито од 20 илјади евра за сместување на пациентка во специјализираната болница.
Според обвинението, Арифи ги побарал парите како гаранција за обезбедување место за 42-годишна пациентка во тешка здравствена состојба, а Амити посредувал во предавањето на парите, при што бил фатен од полицијата.
Обвинителката Искра Хаџи Василева изјави дека располагаат со цврсти докази против двајцата обвинети, оценувајќи ја нивната одбрана дека се работи за „недоразбирање“ како неоснована.
„Доказите што ќе ги презентираме пред судот недвосмислено укажуваат дека станува збор за класичен случај на барање мито и поткуп за постапки што директорот бил должен да ги изврши“, рече Хаџи Василева.
Одбраната, пак, преку адвокатот Скендер Мехмети возврати дека нивната аргументација не треба да се омаловажува и најави дека преку сведоци и материјални докази ќе докажат дека Арифи и Амити немале намера да сторaт кривично дело.
Обвинителката во воведниот говор додаде дека случајот е показател за длабоко вкоренета корупција, но и дека охрабрува фактот што сè повеќе граѓани се решаваат да пријават побарување поткуп.
Според обвинението, Арифи очекувал вкупно 100 илјади евра по продажбата на стан од 94 квадратни метри во Капиштец, сопственост на пациентката. Случајот го пријавила нејзината старателка, која на следното рочиште треба да сведочи како прв сведок.
Арифи се товари за примање поткуп, а Амити за награда за противзаконито влијание.
