ЕК е загрижена затоа што Србија дава пасоши на Руси – можно ли е враќање на визите?
Европската Комисија (ЕК) е загрижена поради измените на Законот за државјанство во Србија.
Тие би можеле да ги олеснат процедурите со кои странските државјани би можеле да добијат српски пасош, јави дописникот на МИА од Белград.
„Комисијата изрази загриженост дека планираните измени на српскиот Закон за државјанство може да претставуваат ризик за јавната политика или безбедноста на Европската Унија (ЕУ), со оглед на тоа што граѓаните на Србија уживаат безвизен пристап до ЕУ“, се наведува во писменото соопштение од ЕК доставено до Радио Слободна Европа (РСЕ).
Граѓаните на трети земји на кои инаку би им била потребна виза за патување во ЕУ, тоа би можеле да го сторат без виза.
Во оваа насока, се потврдува дека ЕК е запознаена со големиот број населени руски државјани во Србија по почетокот на руската инвазија на Украина.
„Европската комисија внимателно ја следи ситуацијата и редовно се распрашува кај српските власти за присуството на руски државјани во Србија. ЕК побара од Србија да ја земе предвид нејзината загриженост“, се наведува во писменото соопштение.
Надлежните од ЕК ја потсетуваат Србија дека како земја кандидат за полноправно членство во ЕУ се очекува постепено да се усогласи со политиките и одлуките на ЕУ.
Во годината на руската инвазија на Украина, стотици илјади Руси побараа привремен или постојан престој во Србија. За седум месеци од 2023 година, пристигнале во речиси ист број како и во целата 2022 година.
Во 2022 година, бројот на руски државјани кои добиле српски пасош се зголемил тројно во споредба со годината пред инвазијата. Овој тренд продолжи и во 2023 година.
Законот за државјанство дозволува Владата да одобри државјанство по посебна постапка под одредени услови.
Како што е дефинирано во законот, државјанството се доделува според таа процедура доколку „приемот во државјанство би претставувал интерес“ за Србија.
Според одлуките на Владата на Србија до 21 август српско државјанство добиле 76 граѓани од други националности. Повеќето од нив се од Русија.
ЕК претходно предупреди дека Србија ќе го ризикува безвизниот режим поради поедноставените процедури за добивање српско државјанство.
Србија е меѓу ретките држави во Европа што не воведе санкции кон Русија и има директни летови со Москва.
Поради тоа што нема напредок во дијалогот Белград – Приштина, има закани дека за Косово и Србија ќе бидат вратени визите.
