Една одлука – повеќе спасени животи: Eве што носат измените за донирање на органи и зошто се важни!
Државата подготвува значајни измени во системот за донорство на органи, со кои секој граѓанин ќе може лично да се изјасни кај матичен лекар дали сака да ги донира своите органи по смртта.
Целта, според надлежните, е одлуката да се врати кај поединецот, а нејзиното почитување да стане неприкосновено.
Министерот за здравство Азир Алиу нагласува дека новиот модел треба да донесе поголема доверба и транспарентност, додека националната координаторка за трансплантација, д-р Билјана Кузмановска, во емисијата „Ноќно студио“ на 4ТВ укажа на реалниот проблем – честото одбивање од страна на семејствата, и покрај постоење услови за трансплантација.
Новите законски решенија треба да го намалат токму овој притисок. Со претходно изразена волја, како што објаснува Кузмановска, ќе се избегнат ситуации во кои различни ставови во семејството ја запираат постапката. Регистарот ќе биде доверлив, а одлуката ќе може да се промени во секое време.
И покрај законските измени, трансплантацијата останува сложен и длабоко емотивен процес. Најтешкиот момент, велат лекарите, е разговорот со семејствата во моменти на загуба, кога треба да се донесе одлука што може да спаси повеќе животи.
Од друга страна, пациентите кои чекаат трансплантација покажуваат висока подготвеност. Кај бубрег и црн дроб речиси и да нема одбивања – надежта за подобар живот е пресудна. Но, кај трансплантацијата на срце, која носи најголем ризик, одлуката е потешка и понекогаш се одбива.
Во моментов, околу 200 пациенти чекаат орган, најмногу за бубрег, додека околу 30 лица се на листа за срце и околу 14 за црн дроб. Постојат и пациенти кои чекаат трансплантација на корнеа.
Во изминатите години, здравствениот систем направи напредок – се зајакнуваат тимовите, се обучуваат лекари и се воведуваат нови процедури. Но, клучниот предизвик останува ист: недостигот од донори.
Затоа, пораката од експертите е јасна – одлуката за органодарителство не треба да се носи во најтешките моменти, туку навреме, со свесност дека со еден чин може да се спасат повеќе животи.
