Една година биле следени криминални групи во Скопје: Од затвор нарачувале убиства за пцовка и други мотиви, како и палење автомобили за ситни пари

Криминални структури координирале убиства, палења на возила, изнуди и други тешки кривични дела, делувајќи директно од затворски установи – откри денеска Обвинителството за гонење на организиран криминал на брифинг со новинари. Тие откри дека станува збор за две организирани криминални групи, поврзани со најмалку седум убиства, од кои две се двојни.

Во еден од случаите, според Обвинителството, постои сомневање дека координаторите давале наредби за елиминирање на сведок кој преживеал напад, со цел да се спречи неговото сведочење во истрагата.

– „Имаше палења на возила, изнуди низ цела држава, координирани секојдневно од затвор. Ова е пораз за системот“, беше речено на брифингот.

Во текот на истрагите биле заплашувани дури и претставници на општините кои требало да спроведат претреси на државни парцели каде што, како што вели, била закопана дрога.

Против девет лица е поднесено обвинение, од кои седум се во бегство. Едно лице било фатено вчера, а за две лица е донесена наредба за затворање на истрага.