„Еден во фармерки, друг во одело, трет со палто од татко му“ Тошковски најавува набавка на 6.000 полициски униформи
По осум години без нова службена опрема, Министерството за внатрешни работи започнува со масовна набавка на нови униформи за униформираните полициски службеници низ целата држава. Веста ја соопшти министерот Панче Тошковски, кој оцени дека станува збор за „крај на игнорантскиот однос“ кон припадниците на полицијата.
„Она што полицајците го носат денес е срамота. Осум години не е набавена нова униформа – тоа не е само административен пропуст, туку слика за непочитување на оние што секојдневно се грижат за нашата безбедност“, изјави Тошковски.
Министерот информираше дека досега била реализирана помала набавка со која се опфатени околу 1.000 службеници, но до крајот на годината нова униформа треба да добијат дури 5.000 до 6.000 припадници, со што речиси целокупниот униформиран кадар ќе биде опремен со современа и функционална работна облека.
Во својата изјава, Тошковски алудираше и на фотографии од терен на кои се гледаат полицајци облечени во фармерки, обични палта и работнички облеки, што, според него, го покажува реалниот проблем на терен.
„Имаше обиди во јавноста да се девалвира процесот на набавка, но вистината е јасна. Граѓаните ја гледаат реалната состојба и сакаат полиција која изгледа професионално и заслужено добива поддршка“, додаде Тошковски.
Во завршницата на својата изјава, министерот ја спомена и политичката димензија на реформите, порачувајќи дека „македонскиот народ е мудар и ќе го каже својот збор на локалните избори“.
