„ЌЕ ИМАМЕ ЗНАЧИТЕЛЕН ТАРИФЕН ПРИХОД НА ПОЧЕТОКОТ“ – еве го објаснувањето на американскиот министер за финансии Бесент (ВИДЕО)
Секретарот за финансии Соединетите Американски Држави, Скот Бесент излезе со поддршка за претседателот Доналд Трамп и посочи дека САД би можеле да собираат тарифи од 300 до 600 милијарди долари годишно.
Оваа бројка сугерира мала краткорочна промена во тарифните стапки објавени оваа недела, но може да помогне да се покријат трошоците за даночните намалувања што Конгресот ги разгледува.
„Ќе имаме значителен тарифен приход на почетокот“, рече тој во интервју за Такер Карлсон. Потоа, рече Бесент, „приходите од фабриките, од даноците на доход од сите нови работни места ќе се зголемат“.
Според него САД би можеле да придобијат меѓу 300 и 600 милијарди долари само од новите тарифи, додавајќи дека многу производи не се произведуваат во САД, и дека се увезуваат, а со тарифите очекуваат да имаат домашно производство.
– На почетокот ќе имаме силен инкам од тарифите, а потоа ќе се зголеми приходот од фабриките и данокот на приходи, но и од новите вработувања – објаснува Бесент кај Карлсон.
Американскиот претседател Доналд Трамп пак го повика претседателот на Федералните резерви Џером Пауел да ги намали каматните стапки.
– Ова би било совршено време за претседателот на ФЕД Џером Пауел да ги намали каматните стапки. Секогаш ’доцни’, но сега можеше да го промени имиџот и тоа брзо – порача Трамп во објава на својата социјална мрежа Truth Social.
Како причина за намалувањето ги наведе падот на инфлацијата и цените на енергијата и го оцени како „голема победа“.
– Цените на енергенсите се намалуваат, каматите се намалуваат, инфлацијата е намалена, дури и јајцата се намалени за 69 отсто, а работните места се зголемуваат, сето тоа во рок од два месеци. Голема победа за Америка. Намали ги каматите Џером и престани да играш политика – рече Трамп.
CNBC објави дека новата трговска политика на американскиот претседател може да биде пречка што ја спречува Федералните резерви да ги намали каматните стапки.
Новите царини би можеле да доведат до широко распространето зголемување на цените, макар и привремено, дополнително да го отежнат движењето на инфлацијата.
Пауел пак претходно предупреди дека Американците наскоро би можеле да забележат пораст на инфлацијата и невработеноста откако Трамп воведе реципрочни царини за повеќе земји.
Тој рече дека економијата е „сè уште стабилна“, но, како што рече, царините на Трамп може да предизвикаат „подолготрајни“ ефекти, како што се повисоки стапки на невработеност.
– Иако неизвесноста е сè уште висока, сега е јасно дека зголемувањето на царините ќе биде значително поголемо од очекуваното. Веројатно истото ќе важи и за економските ефекти, кои ќе вклучуваат повисока инфлација и побавен раст – рече претседателот на ФЕД.
Тој рече дека „обврска“ на ФЕД е да се погрижи „еднократното зголемување на нивото на цените да не стане постојан проблем“, предупредувајќи дека инфлацијата може да се зголеми „во наредните квартали“.
Еве го целото гостување на Бесент:
Фото: Принтскрин/Јутутб
