ЌЕ ИМА НАДДАВАЊЕ: AEK ќе распише јавен тендер за нов мобилен оператор
Агенцијата за електронски комуникации (АЕК) ќе распише јавен тендер за нов мобилен оператор поради голем интерес.
АЕК објави дека ќе распише јавен тендер со јавно наддавање за доделување радиофреквенции, откако добиле писма од три компании: ONE Македонија, Битстрим Мобиле и е& ППФ Телеком Груп.
Агенцијата појасни дека во сличен претходен случај постапила со цел да се ослободат фреквенции и да се заштити конкуренцијата, и дека така ќе делува и во иднина. Со ова се отвора можност за појава на трет мобилен оператор во Македонија.
ONE Македонија предложи измени во условите, вклучувајќи можност за плаќање на рати, попусти за нови оператори, ревидирање на обврските за 5G покриеност и одложување на почетокот на комерцијално работење. АЕК прифати дел од нив, меѓу кои е ревидирање на условот за 5G покриеност – сега се бара сите населени места да имаат 5G сигнал до 2032 година – и дозволи старт со мрежа во најмалку еден град до крајот на 2026 година.
Битстрим Мобиле изрази интерес за фреквенции што не беа опфатени со првичната намера, па АЕК најави дека ќе објави нова процедура за тие опсези.
Но, е& ППФ Телеком Груп оцени дека минималните надоместоци се преголеми, но АЕК објасни дека цените се одредени врз основа на анализа и нема можност за нивно намалување.
