Двајца полицајци од Кочани пријавени за малтретирање при службена интервенција
Одделот за внатрешна контрола, криминалистички истраги и професионални стандарди при Министерството за внатрешни работи поднесе кривична пријава до надлежното Основно јавно обвинителство за гонење организиран криминал и корупција – Специјализираното одделение за кривични дела сторени од лица со полициски овластувања и припадници на затворска полиција.
Пријавата е поднесена против полициските службеници З.Т. и К.Д., поради сомневање дека сториле кривично дело „малтретирање во вршење на службата“ според член 143 од Кривичниот законик.
Според утврдените факти, двајцата полицајци од Полициската станица Кочани при СВР Штип, на 7 септември 2025 година, при интервенција по пријава за гласна музика, влегле во дворот на пријавеното лице и, без да постојат законски услови за употреба на средства за присилба, неовластено употребиле физичка сила. На лицето му била нанесена телесна повреда.
Одделот за внатрешна контрола најавува дека ќе поднесе предлог за поведување дисциплинска постапка поради кршење на работниот ред и дисциплина, а за двајцата полицајци ќе бидат изречени и мерки за отстранување од работното место до завршување на постапката, соопшти МВР.
