ДУИ и ВМРО-ДПМНЕ се судрија во Собранието за онлајн коцкарниците
Пратениците на Европскиот фронт предводен од ДУИ и ВМРО-ДПМНЕ денеска се судрија околу измените на Законот за електронски комуникации
Пратеникот Сали Мурати поднесе 20 амандмани на предлог-законот со кој се предвидува блокирање на веб-страниците за коцкање. Меѓу другото, пратеникот Мурат побара блокирањето на интернет содржините да може да се врши само со судска одлука.
„Прво воведување судска контрола за блокирање на интернет содржини. Ова го кажав последен пат, еве имам некои амандмани по ова прашање. Второ, формирање на јавен регистар за блокирани сајтови.„Третата компонента е дефинирање на процедурите за правна заштита, бидејќи со овие измени не предвидувате правна заштита доколку бидат блокирани“, рече Мурати.
Но, пратеникот на ВМРО-ДПМНЕ Тони Јаревски овие амандмани ги оцени како манипулација. Тој нагласи дека овие измени се прават поради структури кои, како што нагласи, направиле низа злоупотреби, особено во делот на коцкањето.
„Јасно е дека оваа тема и понатаму им е омилена, се уште бараат начини како да заштитат дел од нивните бегалци…“, рече Јаревски.
Амандманите на пратеникот Сали Мурато не беа прифатени, а предлог-законот доби зелено светло во собраниските комисии. Откако законот ќе стапи на сила, ќе биде забранет пристапот до сите нелегални онлајн платформи за коцкање.
Ова ќе се спроведува преку Агенцијата за електронски комуникации, по налог на Министерството за дигитална трансформација и преку интернет операторите што ги регулира.
Во расправата за овие законски измени, пратениците нагласија дека се доделени 48 лиценци на фирми за приредување игри на среќа, а идентификувани се околу 160 нелегални оператори на онлајн коцкање. Граѓаните досега потрошиле 210 милиони евра за онлајн коцкање.
