ДОНЕ ТАНЕВСКИ ПОВЕЌЕ ДА НЕ БИДЕ ЧЛЕН НА НАДЗОРЕН НА „МАКЕДОНИЈАТУРИСТ“ – вонредно собрание, ќе се отповикуваат старите и ќе се бираат нови членови, но кои, засега е тајна

„Скопски пазар“, компанијата која од неодамна е најголем поединечен акционер во „Македонијатурист“ сака да ги отповика претходните членови на Надзорниот одбор на ова хотелиерско акционерско друштво, меѓу кои и некогашниот долгогодишен директор Доне Таневски, кој ги продаде сите свои акции и излезе од сопственичката структура. 

Скопски пазар бара да се одржи вонредна седница на Собранието на акционери, на 17 февруари годинава, на која како точки на дневниот ред е ставено гласање за одлука за отповикување на членови на Надзорен одбор на Македонијатурист, како и избор на нови членови. 

„Собранието на акционери ги отповикува следните членови на Надзорниот одбор
на друштвото: г-дин Доне Таневски, г-ѓа Верица Хаџи Василева-Марковска, г-дин Владо Богдановски, и г-дин Ѓорѓи Јанчевски. Се овластува друштвото да поднесе пријава за бришење на отповиканите
членови на Надзорниот одбор од трговскиот регистар при Централниот Регистар на
Република Северна Македонија“, се вели во предлог одлуката за која треба да гласаат акционерите, а која би влегла на сила со денот на нејзиното донесување. 

Акционерите потоа треба да гласаат за избор на нови членови на Надзорниот одбор, но кои ќе бидат тие засега останува мистерија, бидејќи не се наведени во предлог одлуката, туку за нивните имиња се оставени празни места.  

Само се знае дека ќе бидат избрани четворица нови членови на Надзорниот одмор, од кои еден ќе биде независен член, како и дека нивниот мандат ќе трае шест години. За нив ќе се определи одреден паричен надомест, но засега и висината на тој надомест останува тајна. 

„Собранието на акционери на Друштвото на својата седница одржана на ден 17.02.2025
година ја донесе следната Одлука за избор на членови на Надзорен одбор на Друштвото и определување надоместок
на членовите на Надзорниот одбор. Мандатот на членовите на Надзорниот одбор трае шест години
Член. За членовите на Надзорниот одбор се определува надомест во висина од
__________ денари. Се овластува друштвото да поднесе пријава за упис на избраните членови на
Надзорниот одбор во трговскиот регистар при Централен Регистар“, се вели во таа предлог одлука. 

Инаку, овој јавен повик за одржување на вонредната седница се свикува по барање на Скопски пазар, а ќе се одржи во
деловните простории на друштвото на 17 февруари. 

Согласно Законот за трговски друштва, акционерите кои поединечно или заедно поседуваат најмалку 5 отсто од вкупниот број на акции со право на глас, имаат
право да достават предлог за дополнување на дневниот ред и одлуки по точките од дневниот ред. Акционерите можат да достават предлози за вклучување
на нови точки во дневниот ред, предлози на одлуките и прашања најдоцна во рок од осум дена од денот на објава на јавниот повик за одржување на
седницата.

Според најновата состојба на централниот депозитар, Скопски пазар располага со 19,73 отсто од акционерскиот капитал на таа хотелиерска компанија, потоа Промедика поседува 11,89 отсто, М.Г. Фешн е исто така значаен акционер со 11,26 отсто од акционерскиот капитал, 10,47 отсто има акционерот Симеон Павлов, потоа со 10 отсто располага самата компанија кои ги држи како сопствени акции, и 6,23 отсто поседува „Чеза комерц, Симеон, Роберт и Виктор ДОО“.

Н.Н.Ф.