„ДИЗЕЛАШИТЕ“ МОЖЕ ДА ЗДИВНАТ, НО НЕ И „БЕНЗИНЦИТЕ“ – еве како се менуваат цените на горивата по полноќ
Цените на горивата по полноќ ќе се менуваат, одлучи Регулаторна комисија за енергетика. Притоа, цената на дизел горивото по полноќ се намалува за половина денар за литар, бензинот Еуросупер БС-95 поскапува за половина денар, додека Еуросупер БС-98 поскапува за еден денар за литар. Согласно одлуката на РКЕ цената на Екстра лесното масло за домаќинство (ЕЛ-1) не се менува. Со одлуката се врши зголемување на малопродажните цени на нафтените деривати во просек за 0,13 отсто.
Новата малопродажна цена на ЕУРОДИЗЕЛ БС (Д-Е V) е 76 денари за литар, ЕУРОСУПЕР БС – 95 ќе се продава за 83, а ЕУРОСУПЕР БС – 98 за 85,5 денари за литар, додека цената на Екстра лесното масло за домаќинство (ЕЛ-1) и останува 75 денари за литар.
Со одлуката на РКЕ за 0,222 денари за килограм се намалува малопродажната цена на Мазутот М-1 НС и ќе изнесува 43,797 денари.
Од РКЕ посочуваат дека референтните цени на нафтените деривати на светскиот пазар во споредба со претходната пресметка бележат зголемување кај бензините во просек за 2,891 отсто, кај дизелот за 0,594, кај екстра лесното масло за 0,566 и кај мазутот за 0,314 отсто. Курсот на денарот во однос на доларот по кој беа формирани цените со претходната пресметка е понизок за 0,817 отсто.
