Димовски: Раст во ТИРЗ и покрај кризата, нови инвестиции и расчистување со старите злоупотреби
Глобалните геополитички тензии и растот на цените на енергенсите создаваат сериозен притисок врз економијата, но компаниите во технолошко-индустриските развојни зони сепак бележат раст. Ова го истакна директорот на ТИРЗ, Гоце Димовски, во емисијата „Ноќно студио“ на 4ТВ.
Тој посочи дека најголемиот удар доаѓа од поскапувањето на гасот, чија цена се зголемила од 30–35 на 50–60 евра за мегават-час, што директно ги зголемува трошоците на компаниите. Сепак, и покрај овие предизвици, извозот во првиот квартал од 2026 година е зголемен за над 11 проценти споредено со лани.
„Компаниите работат стабилно, произведуваат и извезуваат, што има позитивно влијание врз економијата“, нагласи Димовски, додавајќи дека фирмите веќе подготвуваат стратегии за справување со кризата.
Во интервјуто, тој изнесе и сериозни обвинувања за претходното раководство, повикувајќи се на наоди од Државниот завод за ревизија. Според него, биле склучувани штетни договори во вредност од над 30 милиони евра, се градело без дозволи, а дел од проектите, како фотоволтаици, биле реализирани без соодветна документација.
„Дозволени биле работи што не смееле да се прават, сè се ставало под тепих – откако дојдов го ‘кренав’ тој тепих“, изјави Димовски, најавувајќи раскинување на спорните договори и расчистување на состојбите.
Тој откри дека биле наследени обврски од 4,3 милијарди денари, кои веќе се намалени, а воведен е и нов систем за контрола, по што ТИРЗ се искачи од 39-то на 2-ро место според антикорупциските критериуми.
Димовски најави и нов инвестициски бран, со фокус на високотехнолошки индустрии. Потврдени се 3 до 4 нови инвестиции, додека се водат преговори со уште 17 до 20 компании, меѓу кои и голем американски инвеститор.
„Целта е квалитетни инвестиции со високи плати, кои ќе ги задржат младите во земјата“, рече тој.
Дополнително, директорот упати повик до домашните компании, нагласувајќи дека ТИРЗ не се резервирани само за странски инвеститори.
„Ако произведувате и извезувате – вратите се отворени и за македонските компании“, истакна Димовски.
Како дел од идната стратегија, најави и трансформација на нефункционалните зони во индустриски центри под управување на општините, како и можност за развој на наменска, вклучително и воена индустрија, користејќи ги предностите од членството во НАТО.
Со новата стратегија до 2037 година, ТИРЗ треба да стане двигател на економијата базирана на технологии, извоз и одржлив раст.
