Димитриеска-Кочоска: Системот Е-фактура сериозен чекор во борбата со сивата економија и реформа во јавните финансии
Министерката за финансии Гордана Димитриеска-Кочоска, заедно со директорката на Управата за јавни приходи Елена Петрова денеска го најавија стартот на имплементацијата на системот Е-фактура, оценувајќи го како значајна реформа во јавните финансии и сериозен чекор во борбата со сивата економија.
„Борбата против сивата економија, односно нејзиното формализирање, е приоритет на Владата и дел од четиригодишната програма. Проценките на Светската банка, ММФ и Европската комисија укажуваат дека сивата економија во земјава изнесува околу 30 проценти од БДП, што е над просекот на Европската Унија. Затоа ни е потребен системски пристап, со мерки што ќе бидат од заеднички интерес и за државата и за бизнис-заедницата. Таа има силно влијание не само врз прибирањето на приходите во Буџетот, туку и врз реализацијата на проекти за подобро здравство, образование, социјална заштита, иновации и економски раст“, истакна на прес-конференција минитерката за финансии.
Таа потенцира дека дигитализацијата на процесите во Управата за јавни приходи, како и во другите институции, е клучна за зголемување на ефикасноста и во прибирањето, и во трошењето на буџетските средства.
„Е-фактурата е дел од нашите напори за дигитална трансформација на јавните финансии. Упатувам честитки до Управата за јавни приходи за спроведувањето на оваа значајна реформа, која носи бенефит за државата преку намалување на сивата економија, но и значајни придобивки за економијата и за компаниите“, истакна Димитриеска-Кочоска.
Како што појасни новиот електронски систем ќе ги замени традиционалните процеси поврзани со обемна употреба на хартија и физички документи и дека со тоа се намалува административниот товар и се поедноставува работењето на фирмите.
Според министерката преку дигитализацијата и ослободувањето од бројни административни обврски им се овозможува на компаниите своите ресурси да ги насочат кон клучните аспекти на нивниот развој и раст.
„Со Е-фактурата ја правиме економијата пофер, потранспарентна и поотворена за инвестиции, а конкуренцијата ја подигнуваме на повисоко ниво. На овој начин обезбедуваме фер услови за работа и основа за одржлив економски раст, кој директно придонесува за подобрување на животниот стандард на граѓаните.Од друга страна, за државата, Е-фактурата ќе овозможи поефикасна наплата на даноците, заснована на точни и реални податоци, како и поцврста и попрецизна борба против сивата економија“, рече министерката за финансии.
Таа потенцира дека воведувањето на Е-фактурата е дел од системскиот пристап на Владата во справувањето со неформалната економија, пристап кој ја зголемува транспарентноста и ја зајакнува довербата меѓу даночните органи и деловната заедница. Тоа е пристап, како што наведе, со кој градиме партнерство за поздрава и поконкурентна економија, со повисоки стапки на раст, повеќе инвестиции, нови работни места и повисоки плати.
Наведувајќи дека Е-фактурата не е само техничко решение, туку темел на современа и одговорна економија, истакна дека таа ќе овозможи државата да располага со навремени и точни податоци за носење квалитетни и одржливи економски политики во корист на граѓаните и стопанството.
На прес-конференцијата најави и дека во Министерството за финансии отпочнати се активности за воведување нов механизам за независна и објективна проверка на примената на даночната регулатива во конкретни даночни постапки, со кој ќе се обезбеди правичен и фер однос, сигурност за даночните обврзници, оневозможување субјективизам во одлучување на даночните инспектори и намалување на споровите кои се разрешуваат во судски постапки. Дополнително заедно со УЈП ќе се отпочне и со дизајнирање на внатрешен механизам за контрола на квалитет во рамки на самата управа.
