Димитриеска Кочоска: Поврат на ДДВ доцни само кај компании што се проверуваат
Министерката за финансии Гордана Димитриеска Кочоска денеска во Собранието на пратеничко прашање рече дека повратот на ДДВ доцни кај фирмите затоа што се прават проверки дали имало фиктивни злоупотреби.
Претходно пратеникот Фатмир Битиќи реагираше дека се крши законот со тоа што се пробива пропишаниот рок од 30 до 60 дена за поврат на ДДВ кон компаниите.
„Што очекувате? Редовен е. Има компании со проневерени пријави. Треба повторно да ги прифаќаме фиктивните фактури и да го финансираме криминалот? Вашата игра беше фиктивни фактури, фантомски фирми, непостоечки жители од Косово, во Бугарија и Турција, затворање на компании итн. Сето тоа е детектирано и тука е проблемот.
Таму каде што има спорни ситуации, има отворени предмети. Додека не се затворат предметите од надлежните институции, логично е дека не може да има поврат на ДДВ. Тоа требаше и вие да го правите, а не само ние“,рече министерката.
Димитриеска Кочоска на следното пратеничко прашање за тоа зошто капиталните инвестиции не се одвиваат во посакуваната динамика, меѓудругото, рече дека се давале фалсификувани банкарски гаранции изнудувани со закани од „нечии внуци“ во Министерството за финансии и дека затоа тие реализации сегасе стопирани.
