ДИМИТАР БОГЕСКИ Е НОВ ДИРЕКТОР НА ДРЖАВНИОТ АРХИВ НА МАКЕДОНИЈА Се залага за дигитализација и поголема достапност на документите
Новиот директор на Државниот архив на Македонија, м-р Димитар Богески, денеска официјално ја презеде функцијата од неговата претходничка.
За него оваа функција не претставува привилегија, туку обврска со јасна цел работата на Архивот да биде транспарентна, отворена, отчетна и достапна за сите граѓани. Тој упати благодарност до досегашната директорка за нејзиниот ангажман и придонес во изминатиот период.
Ова е првпат по долги години на чело на една ваква престижна позиција да дојде човек кој е од редовите на вработените – со 19 години работен стаж, кој ги поминал сите скалила во институцијата. Тоа искуство е од непроценливо значење и ќе помогне во надминувањето на сите предизвици со кои се соочуваат вработените и корисниците на услугите на Архивот.
Целта на новиот директор е Архивот да биде отворен кон сите, да се слушнат различни идеи и решенија со цел подобра и поефикасна работа.
Директорот Богески верува во заедничка и посветена работа, чија цел е Архивот да се издигне на повисоко ниво – како современа институција која ќе обезбеди дигитализација, поголема достапност на документите, зајакнување на научната и образовната улога, како и промоција на културното наследство пред домашната и меѓународната јавност.
.
