Десет фантомски фирми фиктивно добиле 65 милиони евра поврат на ДДВ
Управата за јавни приходи ја заврши интерната истрага за неоснован поврат на ДДВ кон фантомски фирми во изминатиот период. Аферата беше обелоденета минатата година,но досега беше непознаница за колкава сума на пари е измамена државата и нејзините служби.
Директорката Елена Петрова рече дека затворената истрага покажала дека станува збор за 10 фирми кои како поврат на ДДВ добиле вкупна сума од 4 милијарди денари, или околу 65 милиони евра.
Фирми за кои јавноста дозна дека со фиктивни измами ја оштетиле државата и добиле високи суми како поврат на ДДВ од буџетот, за речиси истата вредност се најдоа како должници на листата на неплаќачи на данок што ја објави Управата за јавни приходи.
– УЈП ги заврши инспекциските контроли и резултатите се доставени до Управата за финансиска полиција.Се работи за 10 фирми, а вкупната сума изнесува 4 милијарди денари, изјави директорката Петрова на денешниот брифинг со новинарите.
А.К.
