Денеска започнува целосната примена на ЕЕС системот
Од денеска Европската Унија започнува со целосна примена на новиот дигитален систем за контрола на влез и излез на странски државјани – ЕЕС (Entry/Exit System), со што значително се менува начинот на евиденција на патниците на надворешните граници.
Системот, кој делумно беше воведен во октомври минатата година, сега станува целосно оперативен и ќе се применува на сите копнени гранични премини, пристаништа и аеродроми во ЕУ. Со него се воведува електронска регистрација на патниците од земји што не се членки на Унијата, кои патуваат за краткорочен престој.
Новоста подразбира дека при секое преминување на границата, патниците ќе се регистрираат во системот, при што ќе се евидентираат нивните влезови и излези, како и основни биометриски податоци – отпечатоци од прсти и фотографија. Целта е побрза идентификација и поефикасно следење на дозволениот престој во рамки на правилото 90 дена во период од 180 дена.
Од Министерството за внатрешни работи информираат дека се преземени сите потребни мерки за непречено функционирање на системот на граничните премини, со максимално ангажирање на човечките и техничките ресурси. Граничната полиција ќе ја следи состојбата и ќе презема мерки за одржување на проточноста на сообраќајот, како и за навремено информирање на граѓаните.
Од Асоцијацијата на превозници „Макамтранс“ посочуваат дека не се очекуваат значителни застои во товарниот сообраќај, бидејќи голем дел од професионалните возачи веќе се регистрирани во системот. Сепак, за патничкиот сообраќај се можни подолги задржувања, особено во почетната фаза од примената.
Дополнително, професионалните возачи ќе треба внимателно да го следат престојот во Шенген зоната, бидејќи во наредниот период ќе се применува комбинирано броење на деновите – преку електронскиот систем, но и врз основа на печатите во патните исправи.
