Давкова ѝ одговори на фон дер Лајен: Топката е реквизит, сам со топка никој не игра, што ако топката е од офсајд или со фаул фрлена?
Претседателката на државата, Гордана Сиљановска-Давкова, во интервју за емисијата „360 степени“ на МРТ 1, реагираше на објавата на претседателката на Европската комисија, Урсула фон дер Лајен, на платформата „Икс“, по нејзината последна посета на Скопје.
Во објавата, Фон дер Лајен напиша: „Следниот и единствен чекор пред отворањето на преговорите е јасен. Треба да ја направите договорената уставна промена. Топката е во вашиот двор. ЕУ е подготвена.“
Сиљановска-Давкова, пак, порача дека за време на нивната средба воопшто не се разговарало на таков начин.
„На средбата кај мене не стана збор ниту за топка, ниту за двор, ниту за игралиште,“ изјави таа.
Претседателката додаде дека дури и го прашала премиерот Христијан Мицкоски дали Фон дер Лајен можеби кај него спомнала нешто слично, но, како што вели, и тој одговорил дека не се зборувало за „игралишта и топки“.
„На ‘Твитер’ тоа излезе. Но, ако ја погледнеме метафората, топката е реквизит – сам со топка никој не игра. За игра се потребни двајца и таа се одвива по однапред утврдени правила. Правилата не се менуваат во текот на играта – а тоа, за жал, ни се случи нам. Што ако топката е од офсајд или со фаул фрлена во игралиштето? Или ако голот е празен, па мрежата се искине?“, илустрираше претседателката, додавајќи дека играта без фер правила ја губи својата суштина.
Во продолжение, Сиљановска-Давкова нагласи дека прашањето за уставните измени е во надлежност на парламентот и дека таа не може да даде гаранции за исходот.
