Давкова: Барам помош од Макрон оти „Северна“ е од францускиот предлог
Претседателката на државата, Гордана Сиљановска-Давкова, во изјава за медиумите се осврна на прашањето за употребата на уставното име, истакнувајќи дека очекува поддршка од францускиот претседател Емануел Макрон за изнаоѓање прифатливо решение.
„Нормално дека барам помош од господинот претседател Макрон, бидејќи придавката е француски предлог. Нека најдат решение, не знам… мора да се најде излезно решение, како што знаете, Европјаните, особено тие во ЕУ, можат да бидат многу креативни кога е потребно“, изјави Сиљановска-Давкова со доза на иронија.
Изјавата следува во контекст на континуираните расправи околу начинот на кој институциите и државните претставници ја користат придавката „Северна“, што произлегува од Преспанскиот договор.
Сиљановска-Давкова и претходно порача дека во своето обраќање и јавни настапи го користи името „Македонија“ во согласност со Уставот, но дека очекува „европски дух на разбирање“ при односот кон ова прашање.
Нејзината порака до Макрон, како што рече, е симболична, но и суштинска – потсетник дека токму Франција беше земјата која го понуди т.н. „француски предлог“, врз кој се темели процесот на преговори на Македонија со Европската Унија.
