ДАЛИ ШЕНГЕН БЕШЕ САМО ПУСТ ИДЕАЛ? И Холандија воведува гранични контроли
Холандија од 9 декември воведува контрола на копнените граници.
На тој начин и се придружи на Германија во ограничувањето на илегалната миграција, а контролите треба да траат шест месеци.
„Време е да се справиме со нерегуларната миграција и криумчарењето мигранти на конкретен начин. Затоа од почетокот на декември ќе почнеме повторно да воведуваме гранични контроли во Холандија“, изјави министерот за азил и миграција Маржолеин Фабер.
На земјите-членки на ЕУ им е дозволено привремено повторно да воведат контрола на внатрешните граници во случај на сериозна закана.
Уништениот сон за Шенген
Да потсетиме, Германија во септември повторно воведе контроли на граничните премини, што предизвика протести на многу земји-членки на ЕУ бидејќи ја нарушува слободата на движење во Шенген.
Иако беше забележано дека мерките ќе траат шест месеци, Германија веќе имаше навика да ги продолжи.
Граничните контроли со Австрија се во сила од 2015 година, кога бранот мигранти од Блискиот Исток почна да се упатува кон Европа.
Шенгенскиот договор дозволува привремено воведување гранични контроли во вонредни ситуации, а во изминатата година Германија го искористи европското фудбалско првенство, како и Олимпијадата и Параолимпијадата во Париз за да ги засили контролите на патниците.
Протестираа многу земји, пред се Грција.
„Германија имаше многу толерантна и, би рекол, дарежлива политика кон мигрантите, што сега предизвикува голема општествена реакција. Одговорот не може да биде еднострано откажување на Шенген и префрлање на топката на земјите лоцирани на надворешните граници на Европа. рече грчкиот премиер Киријакос Мицотакис.
Според него, наместо тоа, треба да се имплементира Пактот на ЕУ за миграција и азил, обновен миграциски систем кој ја препознава важноста од чување на надворешните граници на Европа.
Полскиот премиер Доналд Туск изјави дека пристапот на Германија е неприфатлив.
„На Полска не и требаат посилни контроли на нашата граница, туку поголемо вклучување на земји, како што е Германија, во заштитата и безбедноста на надворешните граници на Европа“, додаде тој.
Инаку, германските контроли се однесуваат на границите со Франција, Данска, Белгија, Холандија и Луксембург.
Мерките беа воведени по серијата смртоносни напади со нож во Германија од страна на баратели на азил.
